小編上星期就介紹完深圳福田區嘅一日遊,今次再帶大家行遠少少,一於去寶安區睇下有咩玩喇,感受一下愜意嘅浪漫午後!
#人類熱忱事務研究所
第一站一於去壹方城購物中心嘅人類熱忱事務研究所喇!呢個係深圳首個手作文創主題街區,以手作、美學同下午茶三位一體嘅全新街區,有超過20間商店添。為都市生活創造非凡體驗,首日客流量仲突破2萬!
係入面仲可以體驗唔同類型手作項目,就似造木、皮藝、花藝、陶藝等等,甚至連甜品都可以整!無論你係零基礎定係資深愛好者,都有充分機會全方位參與手作架~係「熱忱」嘅生活,就係拒絕平庸,賦予生命與價值俾摯愛嘅東西!
人類熱忱事務研究所
地址: 壹方城購物中心4樓(CGV電影院附近)
營業時間:週一至週四,週日 10:00-22:00 週五,週六 10:00-22:30
#最美書城——覔書店
行完人類熱忱事務研究所唔知去邊好?當然唔好離開壹方城住,因為呢度仲有一間從全國百幾間參選書店中脫穎而出,成為深圳唯一家獲得 "年度最美書店"嘅得主——「覔書店」。
呢間書店面積高達二萬幾呎,藏書量有20萬本!我諗呢間書店最靚地方,應該就係有300個免費座位,座位隨處而設,無論你係覔書店邊個區域、邊個角落,身邊總係有非常舒適貼心踲座位可以靜下來好好讀一本書~
覔書店
地址:深圳市寶安區新安街道新湖路99號壹方城3樓
營業時間:週日——週四:10:00--22:00 週五——週六:10:00--22:30
#家品店NITORI
可能你會以為佢只係普通嘅家品店?咁你就大錯特錯了~因為佢堪稱係挑戰IKEA 同MUJU 地位嘅一間家品店!NITORI所有家具都係由自己設計,而且係行日式風格,每樣產品都好有設計感~加上店鋪面積超大,比香港嘅IKEA 行得舒服好多。
NITORI
地址:寶安中心區新湖路99號壹方城L2-001/002
#女神專屬車位
扮完文青仲有咩做?出去玩點可以唔影返幾張女神相呃下LIKE!壹方城特登係二樓停車場設置咗深圳首個女神專屬停車層,全層以粉色係為主,全部都係女神車位~
#美藝甜
玩左成日一定肚仔餓啦!實行要女神、文青到底嘅我地,當然要去網店CAFE 美藝甜朝聖一下!呢間Cafe充滿住法式浪漫情懷,成間鋪頭都係滿滿既粉金配搭,好似走咗入仙女夢入面嘅粉色宮殿,被幸福同甜蜜嘅味道包圍住,再配埋個甜品簡直將一日既疲勞都消除!大家要留意返呢個粉色主題係壹方城新店專屬架,而且每日晏就2-3點係用餐高峰時間,唔想排隊記得避開呢個時段喇!
美藝甜
地址:寶安區新湖路&創業一路壹方城購物中心B1層020號
#等TA咖啡
最後介紹多間少女心爆棚嘅咖啡店比大家,就係等TA咖啡!佢有齊網紅店必備嘅元素,包括巨型花牆、波波池、粉紅色佈置、道具等,所以都吸引咗好多人專程去影相同食野架!全店分兩層,以白、粉色做主調,地下嘅巨型花牆刺激少女心,打卡一流~而且仲有供應甜點、咖啡、沙冰、奶蓋、果茶同幾款蛋糕!
等TA咖啡
地址:深圳新安街道金蘭路天悅龍庭B107號鋪
開放時間:星期一至日 上午10時 - 晚上10時