香港人鐘情於日本菜就大家都知道，最近就有一間主打新派札幌料理既 Domon 居酒屋首次進駐香港，分別係淘大商場同港島區西寶城設置新店，等更多香港人可以體驗新派札幌居酒屋嘅飲食文化。

Domon 居酒屋嘅料理有別於一般日式料理，揉合咗「家庭料理」同「鄉土料理」嘅兩大烹調理念，除咗善用時令食材之餘，大廚亦為咗配合香港人喜好而調節口味。

一入到 Domon 居酒屋好似到咗傳統日式居酒屋咁，全店選用木製嘅家具，店內既木刻柱更係寫滿日文菜式，而且牆身有多幅札幌四季嘅風景畫，就好似到咗札幌一樣。加上燈光非常柔和而且坐位闊落，岩曬同家人朋友聚會。

Domon 居酒屋嘅料理設計都非常貼心，主廚更表示因為香港天氣比較熱，所以菜式口味上就會偏向清新同以涼食為主。除此之外，更為左香港新店而特別研發一款特有既菜式——「芝士海老脆脆」，等我地可以一邊飲酒暢談樂事，一邊食小食。

由於 Domon 居酒屋會因為時令食材而推出「不時不吃」嘅期間限定菜單，今期就包括以下兩款：

北海道國士無雙燒北寄貝　$48HKD 

選用北海道當地出產嘅北寄貝，不單肉質肥美，而且味道鮮甜，加上使用北海道本土的國士無雙清酒燒煮而成，最後亦會加上牛油、味椒鹽同青蔥調味。經過清酒烹煮嘅北寄貝份外鮮甜，仲可以感受北海道清酒嘅獨有風味添。

天然火山石清酒煮花蛤　$68HKD

呢道菜係以「高溫熱石燒煮方式」炮製，係鍋入邊亦有放有一粒天然火山石，再注入北海道國士無雙清酒同花蛤同時蒸焗，散發住濃郁酒香。不過唔洗擔心會食到醉，因為清酒遇熱後迅速蒸發～而且仲有個沙漏計時3分鐘就可以食得！

除左期間限定之外，亦有幾款特別推介既菜式，不妨試下！

芝士海老脆脆　$48HKD

呢款係專門為香港新店而研發既佐酒小食，以鮮蝦膠加上原隻海蝦同芝士，再以餃子皮包成三角形再炸。值得一提嘅係以沙律醬混合廚師秘製而成既醬汁，食落有微辣既感覺，兩者配合非常有驚喜。

醬油川海老　$35HKD

作為傳統居酒屋佐酒小食，大廚悉心挑選野生海蝦，並且瀝乾多餘水份，再混合精選嘅麵粉以高溫油炸至香脆可口，最後加入日本秘製醬油快炒。呢款小食香脆可口，再配埋清酒就一流。

海老惠方卷　$68HKD

惠方卷係日本嘅特式壽司，參照傳統以多種食材包製，配料包括青瓜、黃瓜、蟹柳、甜蛋同吉列蝦。顏色非常繽紛，原來亦有住祈福許願嘅意思！

師傅仲即場試範點整惠方卷！

燒栗子薯、燒秋葵($28)、燒免治雞棒($42)

大廚特意以日本海鹽燒製多款燒物，不過 Domon 居酒屋就同其他居酒屋唔同，選用含有栗子味道嘅日本栗子薯，口感更加細滑濃郁，仲帶有淡淡既甜味添。而燒秋葵同燒免治雞棒串就選用日本秘製燒汁製成，三款黎講小編就鐘意燒雞串，表面燒到脆脆地，但內裡肉質依然鮮嫩！

醬燒豚丼　$68HKD

呢個豚肉係選用以食用天然橡果嘅優質黑毛豬，唔單止油花均勻，而且充滿榛果香味，肉質甘香嫩滑。再配上秘製嘅醬汁同黑毛豚肉片煎香，就成為馳名北海道鄉土料理菜式！

除咗食野，點少得特式飲品呢， Domon 居酒屋就有三款推介特飲，值得一試。

巨峰烏龍茶／水蜜桃烏龍茶　$25HKD

呢兩杯都係無酒精飲品，大人細路都岩。大廚巧妙咁將巨峰果汁混合烏龍茶，巨峰味道酸甜，簡直係消暑聖品，岩曬夏天咁熱飲！至於水蜜桃烏龍茶竟然有健美皮膚嘅功效，養血美顏，女生們必揀！

青梅醋清酒（即將推出，售價未定）

青梅醋係近年好受女仔歡迎嘅健康飲品，為左配合炎炎夏日，大廚特意將青梅醋加入北海道國士無雙清酒，調製出 Domon 居酒屋果汁SAKE 夏日特飲！

Domon 居酒屋即將係2018年6月14號開業，即刻約埋朋友仔去體驗一下非一般嘅北海道風味美食啦！

Domon 居酒屋店鋪資料

九龍區

地址：九龍灣牛頭角道77號淘大商場三期地下 G261-265號鋪

電話：2790 2221

營業時間：早上11時30分至晚上10時30分（星期一至日）

港島區

地址：西環卑路乍街8號西寶城UG15號鋪

電話：2542 7068

營業時間：早上11時30分至晚上10時（星期一至六）／早上11時至晚上10時（星期日）