日本料理喺香港極受歡迎，而品嚐清酒亦喺本地愈趨普及。另外，大家亦更愛追求合適嘅酒杯。Riedel今年春季就喺香港推出全新 Junmai 純米杯，「Junmai」直譯係「純米」嘅意思，即係喺釀製過程中並無添加額外酒精嘅清酒。呢個係品牌專為日本清酒而設計嘅第二款酒杯。

Riedel嘅Daiginjo大吟釀杯係品牌第一次推出嘅酒杯，佢喺1999 年推出時引起一陣迴響。大吟釀杯擁有優雅嘅蛋形杯體，再加上凸出嘅杯緣能夠令清酒嘅果味及花香味發揮得更淋漓盡致，並喺甜味、酸度及苦澀味間達至平衡。清酒愛好者對呢隻酒杯愛不釋手，形成用酒杯享用清酒嘅新趨勢。

同Daiginjo 大吟釀杯相比，Junmai 純米杯更能突顯唔同品種清酒嘅複雜性，係用餐時嘅完美配襯。Riedel同170位釀酒師同清酒專家進行咗多達 42 次研討會，利用超過120款日本純米進行「盲評」，先至設計出全新嘅Junmai純米杯。 

延續 Daiginjo 大吟釀杯嘅成功，Riedel 將視線轉移到純米。市場上大部分嘅大吟釀均是味啖而芳香，而純米就講求多樣性及複雜性，無單一特定嘅香味和味道。 

高級清酒以大吟釀、吟釀、純米大吟釀同埋純米吟釀區分，取決於其Seimaibuai (精米程度)，即將造酒嘅米粒表面雜質磨掉後所剩餘嘅部分。由於純米嘅釀製並沒有對精米程度設下明確嘅最低要求，所以佢嘅味道可以廣泛被畫分為辛口淡麗、清新甘甜及馥郁土香。

Riedel第十代傳人Mr. Georg Riedel喺品牌嘅酒杯研發當中擔當重要角色，佢表示好高興能夠同日本主要嘅清酒生產商攜手合作，為各種純米酒帶嚟專屬嘅酒杯。同傳統嘅清酒杯相比，全新嘅Junmai純酒杯更能夠突出清酒嘅豐富層次同埋芳醇味道，包括豐厚嘅酒體、略高嘅酸度，以及醇厚嘅質感。

乍看之下，帶有寬闊杯口嘅全新酒杯可能被誤以為係雞尾酒杯。然而，呢個設計係為平均散發純米清酒經打磨嘅穀物香味、木味同雪利酒般嘅香味。鑽石形嘅杯身底部靈感嚟自 Riedel嘅Extreme系列，能夠控制清酒停留於舌頭之上，突出清酒醇厚嘅質感。杯身連接喺優雅嘅高腳之上，Georg Riedel 笑指係為咗令清酒同餐桌上嘅其他酒類平起平坐。 

Riedel 認為 Junmai 純米杯尤其適合用來享用味道較豐富嘅純米，包括生酛(Kimoto)同山廢 (Yamahai)，或以豐富成熟釀造物釀製、帶有焦糖、乾果及香菇香味嘅純米。而香味較淡及口感較簡單嘅清酒，包括大吟釀、吟釀、純米大吟釀及純米吟釀等就使用 Daiginjo 大吟釀杯更為適合。 

國際知名清酒專家 John Gauntner 曾經參與開發兩款清酒杯，他認為Riedel 創造嘅 Junmai 純米杯將會令全球對清酒更為注目，肯定能夠引起原本對清酒不感興趣嘅人士投放目光。

如果你想品嘗純米嘅話，呢款酒杯一定會令你嘅品酒之旅生色不少，並就此迷上清酒。