各位8,90後仲記唔記得細個最鐘意食咩零食？小編就最鐘意食唧唧冰同芝士圈，依加大個左就好少機會再食到，諗返起細細個拎住十幾蚊已經買到好多零食，但今日應該連一筒薯片都買唔到。一齊同小編盤點以下十大懷舊零食，總有一款係你至愛。

01. 戒指糖

小編細細個最鐘意同朋友去士多買野食，因為選擇多又便宜。作為一個女仔，見到戒指糖既外形咁靚，當然忍唔到手買黎試。至於佢係咩味，小編已經唔記得左，但就好記得食呢隻糖好麻煩，因為個戒指係戴唔穩，搞到隻手黏笠笠！

2. 唧唧冰

岩岩都提過小編最喜歡食唧唧冰，記得當時只係賣一蚊一支，而且五顏六色好靚！有冇人都同小編一樣，鐘意分成一半咁食呢？因為由最頭開始食，到後面就好麻煩。小編大個之後都有買過黎食，但已經唔係以前個種感覺。

3. 樽裝可樂糖

樽仔既造型係模擬可樂罐，打開有白色的可樂糖，除左可樂味之外仲有藍莓味。識食一定係成樽倒落口直接食～同朋友仔分享好快就食完一樽。

04. 媽咪麵

「藍毛毛演奏會開始啦！」講起零食點可以無媽咪麵！細個既時候成日都有衝動將佢當即食麵咁煮黎食...不過係冇試過既。小編就鐘意將媽咪整碎先落調味粉，然後想SHAKE混佢！有冇人同小編會咁食媽咪麵？

05. 牛仔片

牛仔片都一樣好好食，加上當時好少有牛肉味既薯片，而且仲係格仔網，咬落去超鬆脆！小編依加都好想即刻買返包黎食呀。

06. 鱈魚香絲

可能講鱈魚香絲你唔知係咩，但講魷魚絲你一定會知係佢！細細包好快就食曬，成日都覺得唔夠食，一食就要食幾包！

07. 哨子糖

小編由細到大都唔識吹口哨，所以細個既時候成日都食呢粒糖，然後扮自己識吹口哨，不過好容易玩到流口水。

08. 沙爹魚串

相信好多人都有食過沙爹魚串，一包有成廿幾串紥埋一齊，細細個會逐支逐支、逐塊逐塊咁食好滋味，食落仲甜甜辣辣咁！而且成日覺得一包有咁多枝，可以慢慢食，但其實食下食下就冇曬。

09. 煙肉味薯圈

除左牛仔片之外，薯圈都係另一個經典。而且係以煙肉味做主題，而且味道超濃郁。除左拎黎食，仲可以玩添，將圓形薯圈穿落手指扮戒指，之後先食～搞鬼好玩。

10. 眼鏡朱古力

我諗每個食過呢隻糖既人都會用橡筋整成眼罩咁將佢當眼鏡戴！不過依加再帶已經唔岩眼形啦....