繪畫唔一定要學習過，唔一定要有優秀嘅繪畫技巧、日以繼夜練習先可以畫出好作品。只要用心，一樣可以遇上欣賞者，感受作畫人一筆一畫下嘅心思，分享畫中嘅樂趣。

Photo via onoryo

黄永阜，原籍香港人，年輕時係一名軍官，退伍後定居台灣，現時嘅彩虹眷村。步入晚年嘅黄永阜起初只係生活過於無聊沈悶，於是突發奇想，開始用刷子油漆係自己屋企內牆壁上隨意畫畫以打發時間，慢慢由內畫到屋外，越畫越起勁，將殘舊嘅房屋變得生氣勃勃。

Photo via hua0523

後來鄰居見到就開始揾爺爺畫畫，爺爺嘅作畫之路就開始形成，每一面牆都成為左伯伯嘅畫紙。每日3點幾就起身準備早餐，天一光就開始出門作畫，一年無休，一面面平平凡凡、殘殘舊舊嘅牆係爺爺筆畫下煥然一新，充滿五顏六色、色彩繽紛，所以被大家稱呼為彩虹爺爺。

Photo via sunny.lennon

彩虹爺爺冇學過繪畫，靈感來自日常生活、報紙、夢境，每一筆每一畫都係隨心隨意，憑想像力繪畫出嚟，冇特別嘅構圖、布局，想到咩就畫咩，天馬行空。

眷村嘅墻面、地面、門窗，任何角落都被爺爺換上新裝，有各式各樣卡通人物、動物、植物花朵、明人肖像......顏色鮮豔絢麗，充滿活潑開心。畫中充滿童真，表現出伯伯嘅純真可愛個性。

畫中不時會見到很多吉祥祝福語，如「平安百福」、「幸福知足」、「大家有福氣」、「身體保重，才是本錢」，充滿溫暖有愛，感受彩虹爺爺對大家嘅祝福。

由寂寂無名、破舊陰暗嘅眷村，被彩虹爺爺天馬行空嘅畫筆下，繪成出一個色彩繽紛嘅童話世界，一踏入就感受到嘅開朗快樂，令人充滿生命力，尋回童年時嘅開心純樸。

地址：臺中市南屯區春安路56巷 (嶺東科技大學附近 )